Gjatë dy ditëve të fundit në botën e futbollit janë dy emrat më të përmendur në merkato, Xhanluixhi Donaruma dhe Kristiano Ronaldo. Portieri 18-vjeçar italian nuk pranoi të rinovojë kontratën me Milanin dhe nuk janë të pakta skuadrat që duan t’ia rrëmbjenë kuqezinjve që në këtë merkato. Ndërkohë sa i përket Kristiano Ronaldos, është mësuar se ai nuk dëshiron të qëndrojë më në Spanjë pas përfshirjes nën akuzë për evazion fiskal. Drejtori sportiv i Milanit, Masimiliano Mirabeli, duke parë situatën e dy lojtarëve të sipërpërmendur dhe gjithashtu interesimin e Realit të Madridit për Donarumën, i ka lëshuar një sinjal presidentit të spanjollëve, Florentino Perez. “Nëse Ronaldo do të largohet nga Madridi dhe Reali dëshiron Donarumën, ne jemi gati të flasim me Perezin për një shkëmbim të mundshëm. Por padyshim që nuk do të bëjmë ndonjë tentativë nëse çmimi i portugezit është 400 milion euro siç është përmendur në shtypin spanjoll”, tha Mirabeli për “Corriere dello Sport”.
Ndërkohë portieri italian Donaruma është duke e vuajtur shumë reagimin e opinionit sportiv pas vendimit për të mos rinovuar me klubin kuqezi. Sipas raportimit të mediave italiane, ai mësohet të ketë folur me shokët e tij në kombëtaren e kaltër U-21 duke thënë: “Po më masakrojnë!”/Panorama Sport
