Koronavirusi vijon të shkaktojë viktima dhe dëme të mëdha ekonomike në vendin tonë, ndërsa numri i të infektuar është rritur që pas lehtësimit të masave kufizuese.
Lidhur me situatën e krijuar në vendin tonë, ka reaguar deputeti i opozitës parlamentare, Halit Valteri.
Në fjalën e tij, Valteri kërkoi rritjen e numrit të testimeve për të parandaluar përhapjen e COVID-it, pasi sipas tij, kjo është e vetmja mënyrë për të verifikuar më shpejt personat që mund të jenë infektuar me virus.
“Duke parë situatën tejet të rënduar të COVID-it dhe shtimin e rasteve në spitale, do ju lutesha si drejtues i këtij parlamenti, të bëjmë ligj, VKM apo ç’të jetë, sa më shumë testime, të bëhen një mijë apo 2 mijë testime në ditë. Shqiptarët nuk po i vret vetëm COVID, por pakujdesia dhe frika. Zoti Balla ti bëjë një kërkesë qeverisë që të bëjë 2-3 testime në ditë“- tha Valteri.
Seanca plenare nisi në orën 10:00, ndërsa në rendin e ditës janë disa çështje, mes të cilave dekreti i presidentit për tregjet financiare të bazuara në teknologjinë e regjistrave të shpërndarë, që pritet që të rrëzohet.
Megjithatë debati do të fokusohet te ndryshimet Kushtetuese për Reformën Zgjedhore. Opozita parlamentare refuzoi dje që të votonte në komisionin e Ligjeve paktin e 5 Qershorit, që kaloi në parim, ndërsa dy ditë më parë iu plotësua kërkesa për hapjen e listave, që rrjedhimisht sjellin edhe ndalimin e koalicioneve, që e kundërshton opozita jashtë parlamentit./ Opinion.al
