Raporti i prokurorit të posaçëm, Robert Mueller dhe hetimi i tij për ndërhyrjen e Rusisë në presidencialet e vitit 2016, është kthyer në librin më të shitur në Shtetet e Bashkuara.
Lista e librave më të shitur, që është prezantuar nga BookScan ka treguar se mbi 40 mijë kopje të “Raporti i Mueller” janë shitur vetëm në javën e parë, duke qëndruar në krye të listës.
Libri, i edituar nga Scribner dhe The Washington Post, pritet të jetë edhe në krye të listës së The New York Times, sapo të publikohet lista ku përfshihen kopjet fizike ashtu edhe versioni në internet.
Përveç kësaj, Audible.com ka bërë të ditur se edhe versioni audio i këtyre dokumenteve është renditur i dyti, në listën e librave më të dëgjuar, pas librit në versionin audio për jetën e Mbretëreshës, Elizabeta II.
Mueller është angazhuar në fillim të vitit 2017 për të udhëhequr hetimet rreth ndërhyrjes ruse në zgjedhjet presidenciale të vitit 2016 në SHBA, si dhe për të kuptuar nëse ndihmësit e Trumpit kanë bashkëpunuar me rusët, ndërsa ka përfunduar zyrtarisht hetimet dhe i ka dërguar raportin Departamentit amerikan të Drejtësisë më 22 mars.
Raporti i publikuar është version i redaktuar i versionit original, pasi disa elemente të klasifikuara “top sekret” janë hequr nga Departamenti i Drejtësisë.
Pas publikimit të raportit, Prokurori i Përgjithshëm i SHBA, William Barr ka thënë se Mueller ka vërtetuar se Rusia ka ndërhyrë në zgjedhjet në SHBA dhe presidenti Trump ka synuar të pengojë hetimet e tij, mirëpo nuk ka gjetur të dhëna të mjaftueshme që e implikojnë atë./Opinion.al
