Sipas raportit të fundit të Organizatës së Kombeve të Bashkuara për vitin 2019-2020 gratë në Shqipëri shpenzojnë 360-500 minuta në ditë për të kryer punët e shtëpisë si dhe për t’u kujdesur për fëmijët, kohë sipas OKB-së, e cila është e papaguar.
Orët që gratë shpenzojnë për punë të papaguar, pra punët e shtëpisë krahasuar me meshkujt është në nivele alarmante. Sipas këtij raporti Shqipëria është padiskutim vendi i parë në Evropë sa i përket punës së papaguar që bëjnë gratë.
Në vijim të raportit thuhet se 360 minuta në ditë ose ndryshe 6 orë në ditë, harxhojnë gratë shqiptare pa fëmijë për punët e shtëpisë, ndërkohë që 500 minuta ose 8 orë është puna e papaguar që bëjnë gratë me fëmijë të vegjël. Kjo e vendos Shqipërinë në krye të listës globale të vendeve, ku gratë bëjnë më shumë punë shtëpie. Duket se rekordi nuk përfundon me kaq.
Ndërkohë që gratë shqiptare janë ato që bëjnë më shumë punë shtëpie krejt e kundërta ndodh me meshkujt shqiptar. Sipas raportit ata kryejnë mesatarisht 50 minuta në ditë punë të papaguar. Madje paradoksi me meshkujt vijon me faktin se meshkujt pa fëmijë, rezultojnë se bëjnë më shumë punë shtëpie se ata me fëmijë.
Duket se ky rekord çon në një rekord të tretë, i cili ka të bëjë me raportin meshkuj-gra sa i përket punëve shtëpiake. Ky raport, në 6 me 1 në kurriz të grave sa i përket kohës së shpenzuar, bën që Shqipëria të ketë një rekord europian në këtë drejtim./Opinion.al/
