Raporti i Drejtorisë qendrore për shërbimet e anti-drogës (Dcsa) ka publikuar raportin vjetor 2015, njofton sot ministria e Brendshme italiane.
Sipas raportit, vihet re një trend në rritje të tregtimit të kanabisit nga Shqipëria drejt Italisë me avionë.
“Situata në përgjithësi ka mbetur e pandryshuar në krahasim me vitin e shkuar që zbulon rolin hegjemonist të ‘Ndrangheta-s kalabreze-lider në nivel botëror në tregtimin e kokainës- e ndjekur nga Camorra dhe organizata kriminale pulieze”, thuhet në njoftimin e ministrisë italiane, raporton syri.net.
Këtyre organizatave kriminale iu shtohen skuadrat kriminale marokene në gjendje të menaxhojnë trafikun e hashashit që vjen nga Afrika Veriore përmes rrjeteve aktive të shpërndarjes në territorin italian.
Raporti zbulon “një evolucion të mëtejshëm që lidhet me trafikimin e paligjshëm të drogës: së bashku me transportuesit detarë, avionë të lehtë dhe ultra të lehtë shfrytëzojnë pistat e uljes klandestine përtej Adriatikut, duke transportuar nga Shqipëria në vendin tonë sasi të mëdha kanabisi”, vijon njoftimi.
