Në Moldavi u konfirmua si më i miri. Kristi Ramadani është sot numri 1 i peshëngritjes shqiptare për meshkuj, dhe këtë e vërtetoi me dy medalje që fitoi në Kampionatin Europian që po mbahet në Çisinau.
Sportisti i kombëtares garoi me sukses në peshën deri 81 kg, duke fituar dy medalje bronzi, në stilin e shtytjes dhe në dygarësh. Në total, ai ngriti 337 kilogramë, duke mbetur 6 kilogramë prapa vendit të dytë.
Kjo do të thotë se për të dytin vit me radhë, Ramadani është medalist kontinental për vendin tonë. Në 2024, ai fitoi dy medalje argjendi në Kampionatin Europian që u zhvillua në Sofie, duke dalë i dyti në stilin e shtytjes dhe në dygarësh në peshën deri 81 kg.
Në këtë peshë konkurroi edhe peshëngritësi tjetër i Shqipërisë, Erkand Qerimaj, duke zënë vendin e katërt në renditjen e përgjithshme, pasi ngriti në total 333 kilogramë.
Edhe Qerimaj fitoi vjet në Kampionatin Europian në Sofie një medalje argjendi. Objektivi I radhës për peshëngritësat shqiptarë është Kampionati Botëror që zhvillohet në Norvegji në tetor të këtij viti.
