Kryeministri Edi Rama përmes një daljeje në rrjetet sociale në ditën e parë të vitit 2021, ka njoftuar se Shqipëria ka siguruar vaksinën zyrtarisht.
“Shqipëria ka siguruar 500 mijë dozat e para nga kompania Pfizer. Shopingu im në Nju Jork ka përfunduar me sukses. Sasia e dakordësuar do të paguhet menjëherë në bazë të termave dhe procedurës tip të kompanisë Pfizer”, u shpreh Rama.
Kryeministri tha se 10.750 dozat e para do të mbërrijnë në javën e tretë të janarit, ndërkohë që 30 mijë e 250 doza të tjera do të vijnë në Shkurt e më pas në vazhdimësi në muajt të vijim.
“E kemi kaluar kështu hendekun që hapi mu në mes të Europës vendimarrja absurde e prapranueshme moralisht, e pakuptueshme politikisht dhe e pajustifikueshme edhe logjikisht e Bashkimit Europian”, tha Rama ndër të tjera duke u shprehur i indinjuar nga sjellja e BE për shpërndarjen e vaksinës.
Kryeministri tha se një sasi e vaksinës do t’i dhurohet Kosovës për stafin e bluzave të bardha, që do të nisë vaksinimin menjëherë me mjekët shqiptarë.
Gjithashtu Kryeministri ritheksoi edhe planin e vaksinimit, që ashtu si dhe në vende të tjera do të nisë me mjekët dhe infermierët, për të vijuar më pas me punonjës të tjerë të rrezikuar, e më pas me të moshuarit dhe kategori të tjera.
Gjatë daljes së tij, Rama pohoi se Shqipëria është duke negociuar me të tjera kompani për të siguruar sasi shtesë të vaksinës./Opinion.al
