Kryeministri Edi Rama ka takuar në Nju Jork me ministrin e Jashtëm të Emirateve të Bashkuara Arabe, Sheikh Abdullah Bin Zayed Bin Sultan Al Nahyan.
Lajmin e ka publikuar vetë kreu i qeverisë, në një postim në “Facebook”, ku ka publikuar edhe pamje nga takimi.
Rama thotë se me ministrin e Jashtëm të Emirateve të Bashkuara Arabe diskutoi për investimet në Shqipëri, si dhe për vizitën në Tiranë të Presidentit të Emirateve të Bashkuara Arabe, që do të jetë e para e këtij niveli në Shqipëri.
“Me Ministrin e Jashtëm të Emirateve të Bashkuara Arabe, mikun e çmuar Sheikh Abdullah Bin Zayed Bin Sultan Al Nahyan, folëm për finalizimin e paketës së investimeve në Shqipëri, si edhe për vizitën në Tiranë të Presidentit të EBA, Sheikh Mohamed Bin Zayed Al Nayan, e para e këtij niveli në vendin tonë”, ka shkruar Rama në Facebook.
Rama ndodhet në New York në kuadër të Forumit të Nivelit të Lartë Politik për Zhvillimin e Qëndrueshëm, i njohur si Samiti për Objektivat e Zhvillimit të Qëndrueshëm, ku marrin pjesë kryetarët e shteteve/qeverive të vendeve anëtare të Organizatës së Kombeve të Bashkuara.
