Gjithkush pati rastin të shihte sot Kryeministrin në një sulm frontal dhe të verbër ndaj organit të akuzës duke shkërrmoqur edhe atë pak besim që kanë shqiptarët tek institucionet e drejtësisë. Edhe nëse nuk kishit mundësi ti dëgjonit fjalët e tij ndaj prokurorisë së Krimeve të Rënda si “fronti i çorbës së vjetër”, “paraqitje komike”, “gjyq farsë i inskenuar nga amatorë inatçinj”, “kopje surrogato e gjyqit politik” dhe “zgafella injorance institucionale”, ato janë riprodhuar gjatë gjithë ditës në media.
Gjithçka mori shkas nga kërkesa e organit të akuzës për ti hequr imunitetin ish-ministrit të Brendshëm Saimir Tahiri dhe për ta hetuar atë për lidhje me trafikun e drogës.
Prokuroria për Krime të Rënda nuk i la asgjë mangët Kryeministrit. Me një reagim të shpejtë për mediat i kujtoi Edi Ramës fatin e homologut të tij në Kroaci, Ivo Sanader i cili dënua për korrupsion.
“I gjithë faktori politik shqiptar, i mbështetur edhe nga partnerët më të rëndësishëm ndërkombëtarë, hartuan Reformën në Drejtësi, duke pasur si guidë të suksesshme përvojën kroate e rumune, të cilat i ndihmuan për t’u integruar në Bashkimin Europian. Nëse hetimet e Prokurorisë do të shoqërohen me ndërhyrje flagrante të politikës, atëherë qëllimi i Reformës në Drejtësi për luftën kundër korrupsionit dhe pandëshkueshmërisë në nivele të larta, do të jetë një sfidë e cila nuk do të përballohet me sukses”, thuhet në njoftimin e prokurorisë.
Rasti i kroacisë është përmedur disa herë nga ndërkomëbëtarët si shembull i arrestimit dhe dënimit të atyre që quhen “peshqit e mëdhenj” por kjo ështe hera e parë që përmendet nga Prokuroria shqiptare.
Sa seriozisht e ka patur prokuroria jonë kërcënimin për Edi Ramën kjo mbetet për tu parë. Çështja “Tahiri” po tregon qarte se politika shqiptare e ka të vështirë të pranojë vënien në bankën e të akuzuarve të pinjollëve të saj. /Opinion.al
