Nga Reldar Dedaj
Marrëdhënia politike mes Edi Ramës dhe Ilir Metës prej kohësh tashmë ka pësuar krisje. Jeta e të dyve në ditët e sotme, i ka mësuar se duhet të përqëndrohen në atë që i ndan, në atë që i mban larg.
Nisur nga kjo ide, kryeministri Rama po mundohet të krijojë përshtypjen se ka arritur të gjejë rrugën, në mos këtë, ta rihapë atë për të mbajtur në këmbë qeverinë e tij, në rast se 28 deputetë të Kuvendit të Shqipërisë, sipas nenit 105 të Kushtetutës, i kërkojnë mocion mosbesimi atij.
Lidhur me këtë fakt, kreu i Kuvendit ka filluar të luajë lojën për të lënë shenja se një skenar i tillë mund të ndodhë. Jo pa qëllim, në media paraditën e sotme, u hap lajmi me shpejtësi se ish Presidenti Mejdani ka ndërprerë pushimet dhe është nisur për Tiranë për të drekuar me Metën dhe me ish deputetin “qejfprishur” Koço Kokëdhima.
Referuar mediave, Rexhep Mejdani mund të ishte kryeministri në hije në rast se skenari i një qeverie teknike mund të aplikohej nga Ilir Meta.
Nga ana tjetër, kryeministri Edi Rama, nuk ka ngjallur idenë e një spektatori, por ka nisur të krijojë bindjen se ka arritur të përçajë disa deputetë nga opozita dhe në rast të një skenari të ngjashëm, të arrijë të krijojë përshtypjen se ka votat e duhura për të mbajtur në këmbë qeverinë e tij.
Kushtetuta aktuale në nenet 104 dhe 105 jep dy rrugë që të shpien të zgjedhjet e parakohshme, rrugë që, pavarësisht se janë të qarta, sërish mbeten të patestuara në histori. Vendi ynë ka njohur dy raste deri tani të zhvillimit të zgjedhjeve të parakohshme, më 1992 dhe 1997, por asnjë rast nuk ka pasur zgjedhje të parakohshme të kryera me kushtetutën aktuale, e cila u miratua në vitin 1998.
Megjithatë, më shumë se thyerje mes tyre, duam apo s’duam, po krijohet ideja e një loje pa rregulla në fushë. Edi Rama është i interesuar të krijojë bindjen se ka arritur të marrë vota nga opozita, gjë që s’është e vërtetë, ndërsa nga krahu tjetër, Meta po rreket vazhdimisht të krijojë përshtypjen se qeveria Rama është në grahmat e fundit të pushtetit të saj.
Realisht, kjo lojë me protagonist në fushë dy aleat të vjetër, ku në rrugëtimin e të dyve her miq dhe her armiq, nuk është asgjë tjetër, veçse një lojë shifrash dhe provokimesh mes tyre.
