Kryeministri Edi Rama, gjatë një konference për shtyp të mërkurën deklaroi se ka ardhur momenti që vëllazëria në krim mes politikës dhe gjyqësorit të prishet.
Nuk do të pranojmë më që gjykatës, të cilët kanë liruar kriminelë, të kalojnë testin e radiografisë(vettingu), tha Rama.
Duam që vëllazëria në krim mes politikës e gjyqësorit të prishet dhe se vija e kuqe është pozicioni i SHBA-se, BE-se dhe partnerëve kryesorë.
Shumica e thjeshtë nuk mundet më të vazhdojë të emërojë gjykatës dhe të caktojë përbërjen e trupave vendimmarrëse në vend, theksoi kryeministri.
“Ka një përpjekje të madhe nga ana e Partisë Demokratike për të treguar një përrallë nga frika e reformës në drejtësi, por dhe nga mungesa e plotë e dëshirës dhe e mllefit, për të prishur vëllazërinë me gjykatësit dhe prokurorët e korruptuar, të cilët janë kapur për fyti prej pushtetit të vjetër të PD-së, që sot është i plotfuqishëm në sistemin e kësaj drejtësie të kalbur që kemi”, deklaroi kryeministri.
“Përsërisin pa pushim “Venecia, Venecia”, tha ai, dhe nuk ka mbetur tjetër veç të marrin një gondol, të marrin dhe një kapelë nga marinarët e Venecias e të vazhdojnë të përpiqen e të hedhin sa më shumë ujë, për ta holluar substancën e reformës në drejtësi”.
Falë presionit të madh të publikut dhe falë pozicionimit të qartë dhe të hapur të SHBA-së e BE-së, opozita u tërhoq nga thuajse gjithshka, tha Rama, por nuk u tërhoq ende nga kryesorja, që është mosfutja e duarve të partive në procesin e vettingut, radiografisë etiko-profesionale të çdo prokurori dhe gjykatësi, i cili, do të vazhdojë të paguhet nga taksat e shqiptarëve, pasi të ketë dalë pa njollë në radiografi, per legjitimitetin e pasurisë, per cilësinë e vendimmarrjeve në karrierë, në raport me ligjin, dhe per aftësitë profesionale.
Kryeministri tha se në krye të institucioneve të rëndësishme të drejtësisë nuk mund të emërohen më gjyqtarë që do të zgjidhen me një shumicë të thjeshtë, siç ka ndodhur gjatë qeverisjes së PD-së.
Nga 9 anëtarë të Gjykatës Kushtetuese, tha ai, të 9 i ka zgjedhur qeveria e PD-së, madje ka dhe nga ata të zgjedhur me më pak se 71 vota; nga 17 anëtarë të Gjykatës së Lartë 16 janë zgjedhur nga PD me 71 ose 72 vota, pra me një shumicë të thjeshtë. Tani, pyet Rama, çfarë është ky sistem, sipas PD-së, i kapur apo i pakapur? Nuk e dinë përgjigjen, por më mirë se ju e se unë e di populli shqiptar dhe familja e Aleks Nikës, familja e Ziver Veizit, e Faik Myrtajt, përgjigjen e dinë të katër familjet që në dyert e kësaj drejtësie kanë parë të rivrarë djemtë dhe baballarët e tyre. Çfarë është ky sistem i kapur apo i pakapur, me shumicën e thjeshtë të një partie që ka emëruar një e nga një trupat e rëndësishme vendimmarrëse të gjykatësve të këtij vendi, deklaroi kryeministri Rama.
Dyert e BE-se për çeljen e negociatave të anëtarësimit të Shqipërisë janë të hapura, por me kushtin që kjo reformë në drejtësi të miratohet dhe të mos kalohet “vija e kuqe” e vendosur si e tillë jo vetëm prej shumicës qeverisëse, por e kërkuar edhe nga Shtetet e Bashkuara dhe BE.
