Pavarësisht situatës që po kalon vendi dhe krizës politike, kryeministri Edi Rama, gjatë një bashkëbisedimi me gazetarët tha se ekonomia u rrit krahasuar me një vit më parë me 2,21%.
“Ndërkohë që efekti i thatësirës së madhe është i ndjeshëm duke patur parasysh se vitin e shkuar patëm një vit me reshje, që do të thotë edhe me një mundësi të shtuar për rritjen ekonomike si rezultat i prodhimit të lartë të energjisë”, tha Rama.
“Përtej këtij fakti mbetet prioritare të fokusohemi tërësisht te investimet, ato publike e private, vendase e të huaja. Tek të ardhurat që, siç mund ta dini, kanë patur një periudhë problematike për pasojë të frymës së antishtetit që u injektua në mënyrë të vazhdueshme e në forma shumë agresive, gjë që ka ndikuar edhe në rritjen e informalitetit, i cili është e do të mbetet në fokus përditë deri në fund të mandatit. Punësimi ka shënuar përparim që në raport me trendin historik vjen me ulje të re nga 6-mujori i vitit të shkuar. Mos regjistrimi i punonjësve, që është integruar në operacionin anti-informalitet që do të vijojë çdo ditë deri në fund të mandatit. Këtu ritheksoj se është një kosto e madhe ajo që vjen si pasojë e shkeljes së ligjit në rastet kur konstatohet, pasi dëmi që i vjen një biznesi të paregjistruar apo në aktivitet informal është shumë herë më i madh sesa fitimi përmes informalitetit”, u shpreh Rama.
Një tjetër pikë e rëndësishme e fjalës së tij ishte dhe puna e Policisë së Shtetit. Kryeministri theksoi se do të paguhen orët shtesë të policisë. “Do të avancojmë me aktin normativ me të gjitha pagesat jashtë orarit në Policinë e Shtetit”.
Më tej, Kryeministri u shpreh se do të ndërmerret një reformë që në polici të mos ketë më efektivë mbi 55 vjeç. “Do të aprovojmë një reformë për uljen e moshës mesatare për Policinë e Shtetit. Në polici nuk mund të ketë punonjës mbi 55 vjeç”, tha Rama. Gjithashtu, Kryeministri bëri të ditur se do të krijohet edhe një grup i veçantë në Policine Shtetit për t’u marrë me të fortët e lagjeve ose qyteteve.
“Kemi gati një njësi super speciale, që do të merret me të gjithë të fortët e rrugëve, ose të lagjeve ose të qyteteve. Ajo që e kam anoncuar disa kohë më parë dhe që do të jetë pjesë e presionit të policisë kundër këtyre tipave, që nëse do të vendosin të qëndrojnë në Shqipëri duhet të përgatiten për t’u fshehur në vrima që duhet të jenë shumë-shumë të ngushta, përndryshe nuk do të kenë mundësi të marrin frymë” tha Kryeministri./ Opinion.al
