Kryeministri Edi Rama i uron komunitetit hebre Hanukan, i njohur ndryshe si Festivali i Dritave që simbolizon triumfin e dritës mbi errësirën, të spiritualitetit mbi materializmin dhe të lirisë mbi shtypjen.
Përmes një mesazhi në rrjetet sociale, Rama shkruan se është koha për të reflektuar mbi mrekullinë e Makabenjve dhe forcën e qëndrueshme të besimit.
“Ndërsa dritat e Hanukas ndriçojnë shtëpitë dhe zemrat, unë i dërgoj përshëndetje dhe bekime të përzemërta komunitetit hebre në Shqipëri dhe anembanë globit, dhe veçanërisht atyre në Shtetin e Izraelit. Hanukkah, Festivali i Dritave, feston triumfin e dritës mbi errësirën, të spiritualitetit mbi materializmin dhe të lirisë mbi shtypjen. Është një kohë për të reflektuar mbi mrekullinë e Makabenjve dhe forcën e qëndrueshme të besimit. Uroj që qirinjtë Hanukkah të sjellin shpresë dhe dritë në jetën e të gjithë njerëzve hebrenj dhe shkëlqimi i tyre u kujtoftë të gjithëve unitetin dhe qëndrueshmërinë që përcaktojnë shpirtin njerëzor. Chag Hanukkah Sameach”, shkruan Rama.
Hanukkah është një festival hebre që përkujton rimëkëmbjen e Jerusalemit dhe përkushtimin. Hanukkah festohet për tetë netë dhe ditë duke filluar nga dita e 25-të e Kislev sipas kalendarit hebraik, i cili mund të ndodhë në çdo kohë nga fundi i nëntorit deri në fund të dhjetorit në kalendarin Gregorian.
