Kryesocialisti Edi Rama foli ashpër në Asamblenë Kombëtare të PS, duke u terhequr vemendjen socialistëve në bazë të fillojnë të punojnë për fushatën, pasi vitin tjetër janë zgjedhjet lokale. Rama akuzoi se deputetët dhe drejtuesit e PS në rrethe janë kthyer në shefa kuadri dhe e kanë mendjen vetem tek tepsia e pushtetit.
“Në territor partia është larg së qeni partia që duam në sfidat që do kemi më pas, shumica e drejtuesve tanë në territor e kanë braktisur detyrën dhe janë kthyer në ndërmjetës për punësime. Kjo është e patolerueshme ndaj betimit që ne kemi bërë për luftën për ta çuar tepsinë për skrap. Duhet të nisim menjëherë një proces thellimi për të qenë sa më pranë njerëzve, duke e prishur këtë paqe. Shqipëria nuk e ka luksin për të vazhduar të ketë brenda shtetit fole eksplozive për njerëz që nuk meritojnë të marrin rrogën nga taksapaguesit tanë”, tha Rama.
Kryesocialisti përjashtoi veten dhe ua vuri fajin të tjerëve poshtë tij për emërimet në administratë shteterore. “Deputetëve u bëj një thirrje të fortë: Jeni atje për të gjithë dhe askush nuk u ka ngarkuar të bëni kuadrin. Ndërkohë që gjithkush kërkon prej nesh vetëm vëmendjen. PS ose do të bëhet me çdo kusht ose do të dështojë”, u shpreh ai. /Opinion.al
