Kryeministri Rama i është përgjigjur ish-kryeparlamentares Topalli lidhur me situatën e maturantëve dhe universiteteve.
Rama i tha Topallit, e cila doli me fotografinë e polices që ngushëllonte maturanten në protestë, se ajo gënjente me një foto të marrë nga “Jeta Osh Qejf”.
“Ti Jozefinë, merr një foto nga “Jeta Osh Qejf” dhe bën qejf me të duke gënjyer. Ajo vajzë nuk e ka mesataren aq sa thuhet. Po sikur të dalë se e ka mesataren më të ulët dhe që ti gënjen?
Aq bukur aktron sa të ka zili edhe Tinka Kurti, se jeni edhe të dyja nga Shkodra”, tha Rama.
Më tej ai sqaroi se asnjë maturant nuk do të mbetet pa të drejtë studimi. “Asnjë maturant s’do të mbetet pa të drejtë studimi. Pse e them këtë? Janë 27 mijë kuota, nga këto 25 mijë në universitetin shtetëror dhe 22 mijë aplikantë. Kështu askush s’do të mbetet pa hyrë në universitet”, tha Rama.
Ai më pas, lexoi disa nga rezultatet e maturësh shtetërore. “Çfarë t’i bëjmë ne Jozefinë, asaj vajzës me 9.8 mesataren, ku në 250 kuota që ka mjekësia janë të gjithë me 9.9. Çfrarë t’i bëjmë ne Jozefinë atij me mesatare 9.9 në Stomatologji, ku 45 të tjerët që kanë fituar janë me 10-ta.
Ka një raund tjetër, Jozefinë, ku të zgjedhin më të mirët që kanë fituar në të gjitha degët do të lirojnë 9 degët e tjera”, tha Rama.
Rama opozitës: Flisni për hashash sa të doni, por kur vritet një polic nga zona juaj shkojini në varrim (VIDEO)
Kryeministri Rama ka marrë fjalën në Parlament për të replikuar me deputeten e PS-së, Mimoza Hafizi në lidhje me situatën e kanabisit në vend.
Hafizi kritikoi qeverinë për politikat e saj ndaj kanabisit duke thënë se gjendja nuk ka qenë asnjëherë më keq se kaq.
Ndërkohë, Rama mori fjalën pas Hafizit duke thënë se hashashi ka lulëzuar në qeverinë e shkuar. Ai nxori disa komunikata të Policisë së Shtetit kur ministër ishte Bujar Nishani dhe më pas Lulzim Basha.
“Bazuar në shifrat e Policisë së Shtetit të asaj kohe, hashashi ka lulëzuar kur kryetari aktual i PD-së ishte ministër i Brendshëm”, tha Rama.
“Ajo që ka ndodhur sot, është se ne kemi shkatërruar pjesën më të madhe të sipërfaqeve të mbjella me kanabis”, tha Rama duke shtuar se për reformën në arsim do të flasë pas Jozefina Topallit.
Ai madje thumboi opozitën në fund të fjalës. “Flisni këtu për kanabisin sa të doni, por të paktën kur vritet një polic nga zona juaj shkojini në varrim”, tha Rama, duke iu referuar efektivit të FNSH-së të vrarë në Torovicë./Panorama
