Kryeministri Edi Rama ka zhvilluar një bashkëbisedim “sy m’sy” nga “Facebook: me qytetarët. Duke iu përgjigjur pyetjeve të tyre, kreu i qeverisë foli për arritjet që sipas tij, vendi ynë ka bërë në procesin e integrimit në BE.
Rama tha se Shqipëria po punon me ritme të shpejta, duke thënë se në mandatin e 4-të ai do e anëtarësoj vendin në BE.
Kreu i qeverisë nuk harroi edhe fyerjet ndaj kryetarit të PD, Sali Berisha duke e cilësuar atë “bufi i kënetës”.
“Brenda mandatit të 4 të ngremë flamurin kuqezi në majën e shumënderuar dhe shumë dëshiruar të BE. Këtu jemi për pyetje përgjigje por na kanë ardhur dy letra për të hapur dy grupkapituj të tjerë. Është shpejtësi e jashtëzakonshme e ecurisë së negociatave se Shqipëria po i përmbush me hapa të shpejta ndërkohë që këtu zien kazani me bufin e kënetës duke u fryrë zjarreve të mundshme të të shkuarës që do të shuhen të gjitha dhe 11 maji do të jetë fundi i historisë së një kënete me një buf që ka marrë peng opozitën shqiptare dhe i rri si një hije e një mallkimi që prej 1912 mbi kokë”-u shpreh Rama.
