Kryeministri, Edi Rama i ka bërë sërish thirrje emigrantëve shqiptarë që jetojnë në Greqi, që të dorëzojnë zarfet në pikat përkatëse të postës.
Përmes një postimi në rrjete sociale, Rama i kërkon që të mos e lënë dorëzimin për moment të fundit, pasi kanë mbetur vetëm 48 orë nga zgjedhjet e 11 majit.
“Ditë fantastike në zonën E vlorës, e jashtëzakonshme, një diell i bukur, dritë e bukur dhe zakonisht nuk kam nevojë për syze brenda në makinë, por është një dritë e bukur, por e fortë.
Ndërkohë që do të desha të rindërhyj për t’ju dhënë një mesazh shqiptarëve të regjistruar në zgjedhjet e 11 Majit dhe që janë në Greqi, që s’kanë dorëzuar zarfet, ju lutem zarfet dorëzojini në pikat përkatëse të postës së DHL, mos prisni, dorëzojini, mos i lini për moment të fundit, ka akoma edhe pak kohë, janë 48 orë, bëjeni edhe këtë mund të fundit.
Sepse 11 Maji është takim me historinë, si edhe moment zgjedhje për ti dhënë një fuqi të re Shqipërisë në negociatat me BE“, shprehet Rama.
