Kryeministri Edi Rama ka folur për gazetarët pas mbledhjes së kryesisë së Partisë Socialiste. Rama njoftoi se të shtunën do të publikohen emrat e kandidatëve socialiste për zgjedhjet e 30 qershorit.
“Bëmë një diskutim paraprak për t’i paraprire vendimmarrjes së ditës së shtunë ku do të konsolidojmë të gjithë listën e kandidatëve për kryetarë të bashkive, si edhe për këshillat bashkiakë. Për kryetarët e bashkive do të vendosim emër për emër ditën e shtunë, për këshillat bashkiakë do të konsolidojmë të gjitha kriteret e pastaj do të mandatojmë të deleguarit e qarqeve të depozitojnë listën e kandidatëve për këshillat e bashkive për zgjedhjet e 30 qershorit. Në 30 qershor ne do të kërkojmë votën në 61 bashkitë e vendit për të marrë një mandat për katër vitet e ardhshme në drejtimin e mundësisht 61 bashkive”, tha Rama.
I pyetur nëse mund të bëhet një marrëveshje si ajo e vitit 2017, duke shtyrë afatin e regjistrimit në zgjedhje, kryeministri tha se kjo gjë është e pamundur.
“PS nuk bën regjistrime subjektesh të tjera në zgjedhje. Këtë çështje e trajton ligji zgjedhor dhe funksionon një administratë zgjedhore me në krye KQZ. Viti 2017 është tanimë histori, jemi në 2019. Në 2017 bëmë një përpjekje të jashtëzakonshme, të njëanshme, të udhëhequr nga unë që bëmë shumë lutje për opozitën dhe kryetarin e saj. Sot jemi në kushtet ku kemi një përgjegjësi, t’u japim shqiptarëve kandidatët më të mirë”, tha kryeministri Edi Rama.
A është i mërzitur Edi Rama se nuk do të ketë Lulzim Bashën në zgjedhje?
“Duhen gjëra shumë të mëdha që unë të mërzitem. Jam i keqardhur që opozita e PD-së dhe e simotrës së vogël LSI, ka vendosur të shkojë në një rrugë pa krye. Uroj të jetë rrugë me kthim, por nuk kam ndër mend të bëj asnjë përpjekje të kthehen nga ajo rrugë. Burg për ata që bllokojnë zgjedhjet? Unë nuk kam bërë paralajmërim për opozitën në kuptimin e udhëheqësve, sepse ata nuk kanë nevojë për informacion për ligjin që e kemi miratuar bashkë kur ata kanë qenë në shumicë. Ne informojmë të tjerët, që në padijeni të ligjit, mund të përfundojnë pa qenë në dijeni se përfundimi është ai, aty ku nuk kanë se përfundojnë për një drejtues që i bie kokës”, është shprehur Rama./Opinion.al
