I ndodhur në një vizitë zyrtare në Hungari, kryeministri Edi Rama është takuar në Budapest me homologun tij, Viktor Orban.
Në një deklaratë të përbashkët për mediat, Orban theksoi ndër të tjera se Shqipëria ka mbështetjen e plotë të Hungarisë për anëtarësimin në Bashkimin Evropian.
“Kryeministri i Shqipërisë është një mik i madhi Hungarisë dhe vizita e tij është një vlerësim i madh, sidomos pasi është një kryeministër që ka fituar 3 zgjedhje të njëpasnjëshme, sidomos nëse lufta politike është e fortë. Dua ta përgëzoj për fitore. Çështjet e diskutuara sot, së pari është bashkëpunimi politik mes dy vendeve, duam që 100 vjetorin e vendosjes së marrëdhënieve diplomatike ta festojmë. Hungaria është mjaft e angazhuar që të mbështesë Shqipërinë të bëhet pjesë e BE. Jemi të bindur që pa ofruar mundësi anëtarësimi për Ballkanin Perëndimor, nuk mund të stabiliozhemi përsa i përket ekonomisë. Negociuam për çështjet ekonomike, që të gjejmë edhe projketin kryesor, bankën OTP. Kemi investimin e parë të madh në Shqipëri. Dua të theksoj që Hungaria është plotësisht e përkushtuar ndaj Shqipërisë për të arritur anëtarësimin pa asnjë kusht”, tha Orban.
Nga ana tjetër, Rama falënderoi Hungarinë për mbështetjen ndaj vendin tonë, teksa tha se dy vendet do të forcojnë bashkëpunimin.
“Ishte një nder që të isha mik i kryeministrit sot, dhe të kisha mundësi të shkëmbeja me të pikëpamje për tema që përmendi kryeministri por mbi të gjitha për t’i kërkuar mbështetje dhe ndihmë, për zhvillimin dhe integrimin. Hungaria ka përvoja mbresëlënëse ndaj i jam shumë mirënjohës kryeministrit për të na dhënë të gjithë këtë dije. Duam të bashkëpunojmë në ekonomi, por edhe kulturë e arsim. Jam edhe njëherë mirënjohës dhe pres me padurim ta forcojmë këtë bashkëpunim. Miqësia jonë është e vjetër, por miqësia e Shqipërisë dhe Hungarisë është shumë më e vjetër”,-tha Rama./ Opinion.al
