Kryeministri Rama ka qënë sërish në Shkodër ku përvec inspektimeve që ka bërë së bashku me kryebashkiakun Benet Beci në terren është takuar edhe me strukturat e socialistëve.
“Duke komunikuar me dy organizata dhe për të mirëpritur disa anëtarë e anëtare të rinj të kësaj organizate. Dua të them që pas afro 24 orësh këtu në Shkodër më vjen mirë që përjetimi është pozitiv dhe që ndjesia e vlerës së votës është e prekshme. Besoj që është e prekshme jo vetëm për mua, por për banorët e Shkodrës, gjë që e ndjej në kontrastin e jashtëzakonshëm të vizitave të dikurshme me ato pas zgjedhjeve ku buzëqeshja e njerëzve, për t’u afruar, për të dhënë dorën janë gjithnjë e më të forta.
Gjë që është produkt i punës së Benetit me skuadrën, ne e mbështesim pa kushte dhe pa kufizim sepse Shkodra është një potencial i jashtëzakonshëm për zhvillimin kombëtar, jo thjesht se është e gjymtuar për arsye që i kemi thënë. Ishte peng i një krenarie të humbur që përkthehej në një mllef asgjësimi duke u kapur pas të shkuarës, po bëhet hapësira e një krenarie të fituar e që ushqehet nga ndjenja e të qenit në qendër të vëmendjes, nga ndjenja e të shikuarit të ndryshimit të mundshëm dhe patjetër nga ndjenja e të ardhmes.
Për mua është shumë e rëndësishme krenaria e mbështetur në atë që ne mund të bëjmë sëbashku dhe jo thjesht të mbështetemi tek historia, tradita si i vetmi ishull ku mund të vësh këmbën sepse për të tashmen s’ke ça tregon. Është themelore për të siguruar të ardhmen që meritojmë. Mendoj se është laborator i të shkuarit përtej kufirit partiak dhe i të kuptuarit të interesave të përbashkëta, që mbrohen më mirë duke i kapërcyer kufijtë partiakë dhe duke kuptuar që vetë PS nuk është një qëllim në vetvete. Është një instrument për të realizuar qëllime që kanë të bëjnë me vendin e njerëzit.”/Opinion.al
