Kryeministri Edi Rama po zhvillon pasditen e sotme një takim me deputetët e qarkut Tiranë, por dhe me drejtuesit e Bashkisë së Tiranës.
Sipas tvklan, në këtë takim, janë ligjvënësit e rinj socialistë të qarkut Tiranë, si dhe kryetarja e komanduar e Bashkisë, Anuela Ristani.
Detajet e diskutimit të kësaj mbledhjeje ende nuk janë të ditura, por mësohet se pritet një analizë e punës së pushtetit vendor, teksa kujtojmë se kryetari aktual i Bashkisë Tiranë, Erion Veliaj, ndodhet nën masën e sigurisë “arrest në burg”.
Ky takim vjen pasi Rama, ka kërkuar shkarkimin e drejtorëve në bashkinë e Vlorës dhe drejtuesve të degës së Partisë Socialiste.
Mësohet se kryeministri ka qenë paraditen e sotme në Bashkinë e Vlorës, i shoqëruar nga ministri për Pushtetin Vendor Arbjan Mazniku, në mbledhjen e zhvilluar me dyer të mbyllura.
Ende nuk dihet nëse ky vendim i tij lidhet me problematikat e qytetit bregdetar me ujin e pijshëm apo zjarrit në fushën e mbetjeve, një fenomen i përsëritur vit pas viti dhe që ka pasur impakt te sezoni turistik.
