Në konferencën e sotme për mediat, kryeministri Edi Rama është pyetur edhe për koncesionin e sterilizimit çështje për të cilin është vënë nën hetim ish-ministri, Ilir Beqaj.
Rama tha se sterilizimi është një nga veprat më të rëndësishme në shëndetësi që ka sjellë një ndryshim të pamohueshëm, ndërsa shtoi se llogaritë e faturat nuk i takojnë kreut të qeverisë që ti bëjë.
“Është një opinion i akuzës, nuk janë opinionet e akuzës të mjaftueshme që të mjaftohet qeveria. Sa i përket procesit nuk i komentoj. Unë besoj që sterilizimi është një nga veprat më të rëndësishme në shëndetësi dhe ka sjellë një ndryshim të pamohueshëm nga askush në rrethin e profesionistëve të shëndetësisë. Llogaritë e fatura s’më takon mua ta bëj. Do të bëjmë diskutimet dhe analizat tona, por ka një analizë tjetër që nuk e kam bërë unë, por dikush që është e zonja për të bërë llogari, dhe ka dalë diçka që unë jam bërë kurioz dhe kam kërkuar opinion të dytë dhe ka dalë i njëjtë. Pra përfitimi i shtetit nga sterilizimi është më i madh se sa të gjitha fryrjet dhe është vërtet një përfitim i madh financiar sepse janë kursyer një mesatare prej dy ditësh, shtrim spitalor, për individë që kanë kaluar në operacione kirurgjikale”, tha ndër të tjera Rama.
