Edi Rama nuk e ndal sulmin ndaj LSI, madje duket më i ashpër pas akuzave të mbrëmshme të Metës në Opinion. Duke folur nga Kolonja ai kërkoi votat e socialistëve e demokratëve për të nxjerr sipas tij, zyrtarët e korruptuar. Dhe zyrtarët që Rama nënkupton janë ata të LSI, një pjesë prej të cilëve po i shkarkon përmes ministrave teknik të PD-së.
Rama në Kolonjë:
“Është krijuar një sistem që një parti hyn në zyrat e shtetit dhe një parti merr drejtoritë, një parti merr patentat, një parti merr hipotekat. Nëse nuk i japim fund në 25 qershor kësaj historie të shëmtuar, kësaj historie shushunjash që ushqehen me gjakun e njerëzve që kthehet në votë, do ta kemi të pamundur, prandaj në 25 qershor duhet të shkoni në votime socialistë e demokratë për të çliruar veten tuaj nga kthetrat e zyrtarëve të korruptuar që ja u nxin jetën për t’ju dhënë një pronë, një hipotekë, një patentë; për t’u çliruar nga kthetrat zyrtarëve dhe zyrtarucëve të korruptuar që shfaqen në dyert e bizneseve dhe fermerëve që vënë gjoba. Kjo histori nuk ka për të marrë fund ndonjëherë nëse nuk i jep fund populli”, u shpreh Kryeministri Edi Rama.
