Kryeministri, Edi Rama, teksa ka marrë pjesë në një diskutim me sipërmarrjen mbi nismën e re të qeverisë për rishikim tërësor të procedurave administrative të biznesit, është shprehur se brenda mandatit qeverisës, Shqipëria do të ketë një sistem të revolucionarizuar të prokurimeve publike.
Kreu i qeverisë tha se prokurimet publike do të kenë më shumë komponent teknologjik dhe më pak njerëzor. Sipas Ramës, kjo do të bëhet për një proces më të drejtë dhe më transparent në të gjitha nivelet.
“Po lehtësojmnë procedurat për sipërmarrjen. Ne po vazhdojmë punën dhe tani që jemi në fazën e diskutimit të buxhetit të vitit të ardhshëm, do të vendosim fokusin tek revolucioni dixhital duke rritur kapacitetet dhe duke shtuar shërbimet e reja. Kemi nisur dhe një punë inovative me inteligjencën artificiale që do të na lehtësojë ne procese të caktuara, duke filluar që nga prokurimet publike për të cilin kemi një projekt shumë ambicioz. Ne jemi besimplotë që brenda këtij mandati, do të kemi një sistem të revolucionarizuar të prokurimeve publike, me shumë më tepër komponent teknologjik dhe me shumë më pak njerëzor që prokurimet të jenë sa më transparente dhe sa më të drejta në të gjitha nivelet. Kemi ecur përpara dhe me krijimin e një shoqërie publike që do të bëjë të gjitha procesin e blerjeve të përqëndruara, çka deri më sot e bën Agjencia e Blerjeve të Përqëndruara, kjo do të jetë një shoqëri publike që do të krijojë shumë më tepër akses dhe do të ketë më shumë llogaridhënie”-tha Rama./Opinion.al
