Kryeministri Edi Rama, e ka shprehur qëndrimin e tij kundër kandidatit të nominuar për President të SHBA-ve, Donald Trump.
Por sërish Rama është lutur që Trump, të mos zgjedhet në këtë post. “Mos e dhashtë Zoti që Amerika ta zgjedh Trump për president”, ka thënë Rama.
Kreu i qeverisë shqiptare ka thënë se nëse ndodh kjo, atëherë do të përkeqësoheshin marrëdhëniet diplomatike në mes të shqiptarëve dhe amerikanëve. Këto deklarata Rama i dha në një intervistë ekskluzive në Zonën e Debatit në Klan Kosova.
Ai duke folur për zgjedhjen e Hashim Thaçit president i Kosovës ka thënë se Thaçi është pjesë e një kategorie të presidentëve që luajnë rol të rëndësishëm.
“Hashimi hyn tek një kategori e veçantë e presidentëve që mund të luajë një rol të rëndësishëm, nuk është ai i atillë që është aty vetëm për të ngrohur karrigen”.
Ai ka thënë se ndersa në Bashkimin Europian mund të dënojnë njëri-tjetrin, kjo nuk mund të ndodhë mes shqiptarëve.
“Ka pasur raste që aty janë dërguar persona të mos unifikimit kombëtar. Mbase ndodh që në BE të dënojnë njërin apo tjetrin, kurse ne nuk kemi luksin të dënojmë njëri-tjetrin”.
Rama ka thënë se ka një eksperiencë me të qenit në opozitë. “Kur e kam marrë detyrën e kryeministrit i kam thënë vetes që nuk duhet t’i hipi askujt në qafë, ashtu siç ata kanë bërë me ty dikur”.
Ai ka folur edhe për mospajtimet e opozitës dhe pozitës në Kosovë duke u shprehur se të dyja palët duhet të gjejnë një gjuhë të përbashkët.
“Mendoj që ka një potencial të rëndësishëm sot çka e ndava edhe me miqte e të dyja palëve, për të gjetur një rrugë të përbashkët dhe përpjekja për ta lexuar vendimin e Gjykatës Kushtetuese në mënyrë që palët ta gjejnë në një pikë, duke mos thënë që marrëveshja ka vdekur, apo marrëveshja është në rregull”.
Rama ka thënë se Kosova ka ende një demokraci në konsolidim ndërsa edhe Shqipëria ka ende një demokraci jo shumë të zhvilluar.
“Kosova është një vend i ri, është një demokraci foshnjore, ashtu siç është edhe Shqipëria një demokraci fëmijërore. Mungesa e institucioneve në dekada luan rolin e vet, por e rëndësishme është që të mos ndërpritet komunikimi”.
Rama ka folur edhe për bashkëpunimin e Kosovës dhe Shqipërisë duke u shprehur se është folur edhe për mbledhje të të dy Qeverive.
“Në sistemin që kemi vendosur bashkarisht ta ndërtojmë – sistemin demokratik, për të qenë më konkret me kryeministrin kemi folur për mbledhjen e ardhshme të dy qeverive. Ne do të shkojmë në Paris së bashku me kryeministra të tjerë”.
Sipas tij, bashkëpunimi mes të dyja vendeve do të ndikojë edhe në rritjen ekonomike. “Ne kemi trashëguar barriera tarifore, por duhet të bëjmë një mjedis krejtësisht të lirë, për ndërveprimin e njerëzve që do të ndikonte në rritjen ekonomike. Kjo do të ndikonte në zhvillimet ekonomike mes Kosovës dhe Serbisë”.
Ai ka treguar gjithashtu se me kreun e Kuvendit të Kosovës Kadri Veseli është folur edhe për PDK-në dhe sfidat e partisë që është më e madhja në Kosovë.
“Me Kryeparlamentarin kemi folur për sfidën e partisë më të madhe në Kosovë, pas largimit të një lideri historik siç është Hashim Thaçi”.
“Për ta pasur të pamundur komunikim me PD në Shqipëri, ne së pari mund ta bëjmë këtë më një parti demokratike në Kosovë”.
Ai ka folur edhe për gazin lotsjellës që është hedhur në Kuvendin e Kosovës nga ana e opozitës duke u shprehur se nuk ka simpati për këtë.
“Nuk kam ndonjë simpati për këtë veprimtari ushtarake në Kuvendin e Kosovës. Ata kanë justifikime, argumente, i kam dëgjuar me shumë kujdes dhe i respektoj”.
Ai ka thënë se imazhi i Kosovës është lëkundur pas këtyre situatave në Kuvendin e Kosovës.
“Një gjë është e sigurt kjo periudhë e ka rënduar shumë imazhin e Kosovës në sytë e botës”.
“Do të ishte fatkeqësi idea që Kosova mund të bëjë pa botën, pa ata që janë bashkëthemeluesit e shtetit – faktori ndërkombëtar”.
“I rëndësishëm është imazhi, por më e rëndëishmja është që të diskutohet mbi fatet e Kosovës, “Zajednica” e shumëpërfolur”.
Sipas tij, problemet politike zgjedhen vetëm më mënyra politike. “Me mjete të tjera nuk mund të gjenden zgjidhje të shërueshme. Mund të kemi zgjidhje të vogla por që hapin plagë të mëdha”./BW
