Afro dy muaj pas përmbytjeve të mëdha që u shkaktuan në Fushë-Krujë, ku shumë njerëz mbeten pa çati mbi kokë, Edi Rama, Kryeministri i vendit, ka vendosur të takohet me banorë të kësaj zone. Ai u ka mbajtur një leksion të gjatë të pranishmeve duke u shpjeguar se si ai e gjeti këtë shtëpinë e përbashkët “Shqipëri” në gjendje të vështirë dhe me shumë borxhe. Ne erdhëm në këtë detyrë shumë vonë, tha Rama, pasi Shqipëria u rrënua për 20 vjet. Si edhe herë të tjera, Kryeministri u përpoq t’ia lërë shumicën e fajeve, për gjendjen e vështirë ku jemi, paraardhësit të tij Sali Berisha. “Ç’a i bëri Berisha maleve të Krujës nuk ia bëri asnjë Sulltan, i hëngri malet e Krujës”, tha ai.
Në fakt i gjithë fjalimi i tij i gjatë ishte mbushur me akuza për PD-në. Ndër të tjera Rama do të shprehej në Fushë-Krujë se: “Ajo që ka ndodhur në Shqipërinë e viteve të fundit s’ka ndodhur as në kohën e Skenderbeut, as në kohën ilire. U ndërtua në lumë. U ndërtua sepse njerëzit nuk kishte kush ti orientonte, ndaj gjithë investimet e bëra me gjak i mori lumi”, vijoi Rama.
Më tej ai u justifikua edhe për faktin se në Nëntor kur ndodhen përmbytjet udhëtoi drejt SHBA-ve për ekspozitë personale dhe nuk shkoi pranë banorëve të zonave të përmbytura. “Nuk mund të bëjmë si ata (PD) që shfaqen në derë sa për të dalë në TV me çizme dhe më pas zhduken kur del dielli”, tha Rama.
Sipas tij, të mirat arrihen me sakrifica e mundë, siç po bën Kryeministri me këtë Shtet, që sipas tij është i varfër, sepse e la Berisha në borxhe. “Kjo kërkon kohë dhe mundë se ato që nuk u bënë për 20 vjet s’mund të bëhen në 3 vjet. Ne do investojmë për këtë zonë, do japim edhe dëmshpërblimet sipas listës nga 100 mijë lekë (të vjetra) deri në 7 milionë lekë (të vjetra)”, u shpreh ai. Në fund ai shpërndau në mënyrë simbolike disa nga çeqet e dëmshpërblimeve për të përmbyturit. /Opinion.al
Foto: Rama shperndan çeqet në Fushë-Krujë
*Pamjet e permbytjeve te nentorit ne Fushe-Kruje
