Në kulmin e debatit për teatrin kombëtar, ku aktorët bëjnë rezistencë që të mos shembet, Kryeministri Edi Rama duket i vendosur në rrugën e tij. Stadiumi i ri dhe teatri kombëtar do të renditen mes veprave të bukura arkitekturore europiane, thotë ai. Deklarata e Ramës nis me sheshin Skenderbej, që sipas tij po garon për çmimin europian dhe e mbyll me mesazhin për skeptikët që nuk besojnë tek ai përsa i përket veprave publike.
Statusi i plotë i Ramës në facebook
Kur 10 vite më parë, thosha se Sheshi i Ri Skenderbej do jetë ndër hapesirat më të bukura publike të Europë, çfarë nuk më dëgjuan veshët.
Sot, Sheshi i Ri Skënderbej, pasi u bllokua si kantier, u shkatërrua për t’u zëvendësuar me një rrethrrotullim makinash me një kurabie bari në mes dhe, më në fund u rindërtua e përfundua, është përzgjedhur në listën e finalistëve për Çmimin Europian të Hapësirës më të Bukur Publike 2018, në Barcelonë.
Të shohim nëse do të shpallet fitues, por sidoqoftë ka marrë tanimë edhe vulën më prestigjoze europiane, si një ndër hapësirat më të bukura publike të Europës?
(Prandaj, ata që hidhen përpjetë sapo shfaqen të rejat që sjell vizioni e këmbëngulja modernizuese në hapësirën tonë të përbashkët, bëjnë mirë ta nxjerrin mësimin nga kjo histori, sepse nesër edhe Stadiumi i Ri Kombëtar edhe Teatri i Ri Kombëtar, do të jenë në të njëjtën kategori të Familjes Europiane të veprave të bukura urbanistike e arkitektonike, siç është tanimë Sheshi i Ri Skënderbej)?
*Fotoja eshte postuar nga Kryeministri
