Gjatë një takim me ushtarakët, kryeministri Edi Rama duke folur për vendimin e fundit të qeverisë për rritjen e pagave, është shprehur se kjo masë nuk merret për qëllime elektorale, pasi vitin e ardhshëm mbahen zgjedhjet parlamentare dhe vendimi u mor në kundërshtim me rekomandimin e FMN-së.
Por nga ana tjetër, kreu i mazhorancës nuk la pa akuzuar qeverinë “Berisha”, duke thënë se tashmë po u rikthehet dinjiteti ushtarakëve.
“Patjetër që nuk është pak dhe nuk mund të mos jetë arsye për të qenë krenar që kemi bërë hap pas hapi për të vënë në vend dinjitetit, duke kthyer kompensimin mujor për ushqimin, që ishte hequr. Po si mund të jemi të kënaqur me këtë në shek. e XXI. Ju e dini më mirë se unë se Ministria e Mbrojtjes akumuloi 16 milionë euro borxhe për shërbime të papaguara ndaj të tretëve. Ndërkohë që u ndërpre dhe kompensimi për ushqimin, u blenë aparatura për përgjimin që si duheshin dreqit. Është e shkuara dhe ne s’kemi se si mos të ndihemi mirë që këto gjera i kemi korrigjuar në proces”, u shpreh Rama.
Kreu i qeverisë më tej shtoi se, ai nuk është krenar për gjendjen ku ndodhet vendi pasi shumë vuajnë ende nga varfëria.
“Si mund të jem i kënaqur kur ka kaq shumë njerëz janë ende në kthetrat e varfërisë. Janë rreth 1 miliardë dollarë që shkojnë në xhepat e familjeve në formën e mos marrjes së taksave dhe së fundi me rritjen e rrogave.
Si mund të jemi të kënaqur në qoftë se sot dhe gjithë ditën, fëmijët shqiptarë janë të kërcënuar nga alfabetizmi”, tha ai.
