Kryeministri, Edi Rama, këtë të shtunë është ndalur në një takim elektorak në qytetin e Gjirokastrës, ku vijoi fushatën elektorale për zgjedhjet e 14 Majit.
Rama u shpreh se PS-ja meriton mbështetje në zggjedhje pasi e ka treguar që di t’iu gjejë ilaçin plagëve.
“Meritojmë mbështetjen dhe besimin sepse kemi treguar që dimë t’i shikojmë plagët. Kemi treguar që dimë t’ua gjejmë plagëve ilaçet. Dimë që ti shërojmë dhe kurojmë plagët. Kemi treguar durimin e madh për të këmbëngulur deri në shërimin e tyre”, tha Rama.
Sa i takon ndarjes majtas dhe djathtas, Rama tha se nuk ka ne dhe ata kur punojmë për të garantuar një qytet më të mirë për shqiptarët.
“Është koha e një kapërcimi të gardhit edhe për ata që janë mësuar të qëndrojnë në krahun tjetër të gardhit në emër të ndarjeve ideologjike, e djathta, e majta. PD, PS, ne ata. Nuk ka ne, ata kur punojmë për të garantuar një qytet apo një fshat më të mirë për shqiptarët. Nuk ka ne dhe ata kur bëhet fjalë për të pastruar. Këtu nuk bëhet fjalë për të ndarë sinoret politike, nuk bëhet fjalë për të ndarë me tifozllëk sa të fortë jemi ne apo ata. Këtu bëhet fjalë për të angazhuar njerëzit e duhur, dhe për tu gjetur punë njerëzve dhe jo njerëzve punë. Ky është dallimi më i madh në këtë fushatë. Ka forca përballë nesh që duan t’i gjejnë njerëzve punë nëpërmjet votës. Ne jemi forcë që duam që punës ti vemë në dispozicion njerëzit dhe njerëzit e duhur duke bërë punën në krye të bashkive”, u shpreh Rama.
Rama gjithashtu premtoi që pagën minimale ta çojë në 60 mijë Lekë.
“Pa 60 mijë lekë pagë minimale detyra jonë është e papërmbushur”, tha Rama
