Partia Socialiste ka mbledhur sot Asamblenë Kombëtare në amfiteatrin e Tiranës ku do të zgjidhen drejtuesit e saj të rinj.
Kryeministri Edi Rama, deklaroi gjatë fjalës së tij se Partia Socialiste është e vetmja e mirë në politikën shqiptare dhe se ka ende më shumë potencial që ajo të votohet më shumë nga shqiptarët.
“Na duhet një mandat për Shqipërinë që të kalojë nga ecja në vrapim. Sot janë kushtet për të shpjeguar si dhe pse Shqipëria të kalojë në një nivel të ri shpejtësie, dhe kush mund ta arrijë përveç PS. Ne jemi e vetmja e mirë që ka në politikën shqiptare. Nuk jemi më e mira e mundshme, duhet të jemi të vetëdijshëm që potenciali është për shumë më tepër besnikëri ndaj vlerave, më tepër besnikëri ndaj atyre që meritojnë më shumë, dhe më shumë besnikëri ndaj bindjes që shqiptarët e votojnë dhe do ta votojnë në shumicë PS.”, deklaroi Rama.
Kryeministri u ndal tek sistemi i drejtësisë dhe konsideroi gjyqtarët dhe prokurorët para reformës në drejtësi si “korporata më e madhe anti-shtet”.
Ai konsideroi një nga arritjet më të mëdha të qeverisjes së tij, vendosjen e themeleve të sistemit të drejtësisë. Ky i fundit sipas kryeministrit Rama ka ende “rrëmujë” dhe “pisllëk” por, siç tha ai janë vendosur themelet të cilat do t’i garantojnë një sistem të drejtë fëmijëve tanë.
“Ne kemi bërë gjithçka që quhet vendoja e një raporti të ri me drejtësinë, dhe jo me drejtësinë në sensin e sistemit por në sensin e të drejtës. Këtë mendoj që ne duhet ata bëjmë pjesë të të gjithë bashkëvendimeve shqiptare nga sot e deri kur të bjeri gongu i vrapimit në sprintin drejt 25 prillit. Sot drejtësia si drejtësi në sensin e sistemit, është një kantier ku punohet ku ka plotë akoma rrëmujë ku ka plot pisllëk ku ka plot ende për të përfunduar por ku për herë të parë qysh nga ndryshimi i sistemit janë vendosur themelet e një sistemi drejtësie që do tu japë mundësinë fëmijëve tanë të mos e pësojnë si ata që lindën në 1990 dhe sot nuk e kanë një sistem drejtësie të drejtë. Për ta ngritur sistemin e drejtësisë nuk mjafton as vullneti as vizioni as ligjvënia por duhet shumë më tepër, duhet kohë. Sistemeve të cilave ne i referohemi nuk duhet të harrojmë që janë ngritur jo kur ne s’kishim lindur por edhe kur ata që na kanë bërë kokën nuk kishin lindur. Sot kur kemi forcën tërheqëse të BE do të kapërcejmë etapat për të arritur brenda një dekade të ngremë drejtësinë.”, u shpreh kryeministri.
Kreu i qeverisë sulmoi edhe opozitën duke thënë se nëse ata qeverisin nuk do të ketë kurrë drejtësi dhe shtoi kush do drejtësinë duhet të mbështesë Partinë Socialiste.
“Kush do drejtësinë nesër duhet të mbështesë pa ekuivok PS. Kush do mjafton të dëgjojë Ilir Metën, Saliun, Monikën , Lulin megjithëse Luli bën atë që i thonë. Me ne ka për të patur vështirësi por në fund ka për të patur drejtësi. Me ta në krye ka vetëm vështirësi dhe kurrë s’ka për të pasur drejtësi.”, deklaroi Rama. /Opinion.al
