TIRANË- Rama gjatë debatit në parlament me Berishën tha se u keqinterpretua deklarata e tij në Sarandë për veriorët. “Nuk ka në jug asnjë okupator tjetër që të ketë marrë tokat e familjeve atje përveç atyre që ti i di shumë mirë që janë një grusht i vogël njerëzish që kanë përvetësuar mijëra e mijëra hektarë jo për të ndërtuar shtëpi, siç bënë ata që erdhën nga veriu, por për tu pasuruar.
Janë 50 mijë hektarë të cilat sot janë verifikuar që janë marrë me falsifikime nga pronarë inekzistent. Ky ja ka dhënë ato prona, por ato do t’i kthehen shtetit dhe pronarëve atje”, tha Rama.
Sipas tij është ish-kryeministri Berisha i cili ka nxitur ndër vite përçarjen e shqiptarëve në varësi të origjinës së tyre. “Përçarjen me njerëzit në veri je munduar ta nxisësh historikisht me të gjithë kryeministrat. Nëse ka një kryeministër që duhet të shkojë t’i kërkojë ndjesë atyre në Bathore dhe atyre që ndërtuan pa leje ai je ti. Sa për revoltën popullore, ti që më bën thirrje të lexoj flakët e bunkerit duhet të gjesh aftësinë të lexosh rezultatin e zgjedhjeve, bëhu gati të lexosh edhe 2017-ën”,tha Rama.
