Ndërsa njoftoi sigurimin e një kontrate prej 500 mijë dozave të vaksinës Pfizer, Kryeministri Rama tha ndër të tjera se dy vende mike, të cilat ai nuk i përmendi me emra, kanë ofruar 9 mijë doza të tjera për Shqipërinë.
Njëkohësisht kryeministri shprehu indinjatë për sjelljen e Bashkimit Europian, në këtë situatë.
“E kemi kaluar kështu hendekun që hapi mu në mes të Europës vendimarrja absurde e prapranueshme moralisht, e pakuptueshme politikisht dhe e pajustifikueshme edhe logjikisht e Bashkimit Europian”, tha Rama ndër të tjera.
Kryeministri kujtoi se vaksina nuk do të jetë e detyrueshme dhe se qendra e parë e vaksinimit do të vendoset në stadiumin “Air Albania”
“Ne nuk do të humbim kohë sepse sigurimi i vaksinës pa pritur që të kujtohet BE për ne ishte një sfidë menaxhimi. Kjo është një sfidë e madhe më vete. Jemi mirë përgatitur për të ngritur në kohë strategjinë e vaksinimit. Qendra e parë do të jetë ajo e Tiranës në Air Albania Stadium me një mjedis me standarde të larta”, u shpreh Rama duke bërë të ditur se motoja e fushatës së vaksinimit do të jetë, “Shqipëria buzëqesh”.
“Vaksina do të jetë falas por jo e detyrueshme. Pavarësisht kësaj ajo është e këshillueshme për të gjithë. Vaksinimi do të nisë me bluzat e bardha, mësuesit, efektivët e policisë në terren dhe moshat madhore mbi 75 vjeç. Jam tejet i lehtësuar sot pas këtij dakordësimi të marrëveshjes për vaksinën. Jam i lumtur që munda t’iua jap sot këtë lajm të gëzueshëm. Qoftë oguri fantastik dhe prova shembullore e faktit se më të keqen e kemi lënë pas dhe më të mirë e kemi para”, tha Kryeministri./Opinion.al
