Kryeministri Edi Rama teksa foli nga Shkodra për situatën politike në vend nuk e ka kursyer ironinë ndaj kreut të Partisë Demokratike, Lulzim Basha.
Rama rikthehu në vëmendje protestën e PD para dy vitesh, duke thënë se Basha i ngriti çadrën poshtë zyrës së Kryeministrisë dhe “këndonte himnin që në mëngjes”.
“Si sot dy vjet më parë, vinte te çadra. Vinte dhe këndonte himnin që në mëngjes. Vinte si te puna e babit. E çfarë bënte? Mblidhet turistët që sillte Voltana dhe Xhelali, këndonte himnin e iu thoshte njerëzve: ‘Shihemi nesër’. Basha në atë kohë mori gjithçka që dëshironte, gjithçka ia dhamë në tavolinë.
Ia dhamë se tha ‘në arsim nuk ka kushte’, ‘te burgjet ka probleme’, ‘te hipoteka nuk bëhet puna si duhet’ dhe i thamë ‘merre arsimin’, ‘ja ku e ke edhe hipotekën’, ‘merri dhe burgjet’ e unë atë kohë s’kam ndërhyrë, edhe zëvendëskryeministren ia lamë. Edhe në KQZ morën shumicën e anëtarëve, edhe kryetarin ia dhamë. Nuk ndryshuan gjë.
Ramë dakord për të ndarë pushtetin derisa të mbahen zgjedhjet. U mbajtën zgjedhjet, i fituam. Tani del prapë dhe thotë dua pushtet në tavolinë. Pse këtë punë kam unë, sa herë ka zgjedhje të dëgjoj Lulin që kërkon pushtet në tavolinë. Tani nuk është vetëm. Ka marrë me vete edhe fallxhoren. E dëgjova sot, fallxhorja kishte thënë ‘ka zgjedhje të parakohshme’. I thoshte insisto se do të ketë. Zgjedhjet do të mbahen më 30 qershor dhe ne do të fitojmë me ekip fitues”, tha Rama. / Opinion.al E.Xh.
