Edi Rama duket se është pajtuar me ish-kryetarin e Bashkisë së Vlorës, Shpëtim Gjika pasi kishin 2 vite marrëdhënie të ngrira. Atij i është besuar detyra e koordinatorit politik për Bashkinë e Selenicës dhe zonën e Lumit të Vlorës. Gjika do të punojë në këtë zonë me deputetin Fatmir Toçi për forcimin e kapaciteteve drejt zgjedhjeve të 18 qershorit 2017. Vetë Gjika ka postuar lajmin në profilin e tij në Facebook, ku njofton se tashmë ka një status të ri.
Ky lajm vjen pas një periudhe acari në marrëdhëmiet mes tij dhe Ramës, që në shkurt të vitit 2015, ku disa muaj para se të përfundonte mandati, Gjika u arrestua për shpërdorim detyre me lejet e ndërtimit.
Rama tha në një deklaratë publike se Gjikën e kishte mik, por nuk mund ta amnistonte. Gjika nuk u kandidua më për shkak të këtij procesi gjykimi nga i cili u shpall i pafajshëm më pas. Rikthimi i tij forcon pozitat e një kandidimi të mundshëm të Gjikës në listat e këtij qarku, ku Rama është shprehur se do ta kryesojë vetë garën përsëri.
Pak kohë më parë, kur flitej për një bashkim të mundshëm të Gjikës me Partinë Agrare të Agron Dukës, Fatmir Toçi shkruante në Facebook se Gjika ngelej një socialist dhe si i tillë nuk kishte vend në familje tjetër politike.
*Statusi në facebook i Gjikës
