Kryeministri Edi Rama nga Gjirokastra ka folur sërish për vendimin e opozitës, për djegien e mandateve. Në takimin “Bashkia që duam”, Rama tha se opozita është në panik, sepse ata e dinë që drejtësia e re ka punë me ta.
“Ata janë në panik sepse ata e dinë që drejtësia e re ka punë me ta. Ata duke braktisur Kuvendin dhe duke u përpjekur si të mbyturit pas fijes së barit dhe që duan ta shtyjnë këtë vend drejt rrugës së destabilizimit, nuk ka asnjë shans të funksionojë. Ajo që unë dua të them është që nuk është mirë që ata u larguan, por nga ana tjetër është pak, por e sigurt se ata Shqipërinë nuk kanë për ta kthyer dot. Sepse ata rrugën e Shqipërisë nuk e hedhin dot në erë. Fatkeqësisht dëmtohen njerëzit e zakonshëm, ata që bëjnë një biznes, kjo ka ndodhur këto ditë kur ata kthyen fantazmën e dhunës ndaj institucioneve, por që u zbraps me sukses të plotë. Ne jemi më të drejtën, sepse edhe më shumë njerëz do të kuptojnë se politika e rrëmujës dhe përçarjes me qëllim dëmtimin e interesave të vendit, nuk është politika që do të sjellë të mira për vendin”, theksoi Rama.
Deri më tani bëhet fjalë për 56 deputetë të opozitës kanë firmosur me vullnet të plotë deklaratën për heqje dorë nga mandati i deputetit të këtij legjislativi. Ndërkohë sot u mësua se Kuvendi i është drejtuar KQZ-së për të zëvendësuar deputetët e opozitës, duke mos humbur kështu kohë, pasi ligji e parashikon që ky institucion kishte 30 ditë kohë. /D.I Opinion.al
