Në kuadër të aksioneve të ditëve të fundit për lirimin e hapësirave publike në plazhe ka reaguar edhe kryeministri Edi Rama. Administrimi i plazheve në territorin bregdetar sipas kryeministrit është në gjendje “rrumpallë”dhe ai shton se këto aksioni i inspektorateve nga fillimi i korrikut po e përmirëson situatën.
Megjithatë Rama shkruan se kjo nuk mjafton dhe paralajmëron se në vjeshtë do të propozohet një projekt-ligj i ri në kuvend për administrimin e vijës bregdetare nga shteti.
Ai është treguar i ashpër ndaj atyre që i quan zyrtarucë, të cilët në pjesën më të madhe janë pjesë e administratës së Bashkive të administruara nga Partia Socialiste duke patur parasysh se bashkitë e vendeve bregdetare, përjashto Shkodrën dhe Lezhën, kanë qenë dhe janë të drejtuara nga Partia Socialiste.
“Kjo pasuri kombëtare i takon POPULLIT dhe pushimet u takojnë njerëzve, jo abuzuesve të çdo kategorie; nga tregtarët qē nuk lëshojnë kuponat, tek harbutët që zaptojnë plazhet dhe deri tek zyrtarucë shtetërorë e pushtetarë vendorë, të cilët në vend të detyrës ndaj vendit dhe pushuesve, u bëjnë qoka dëmtuesve e zhurmuesve” shkruan ndër të tjera kryeministri Rama.
Me disa ndërhyrje të shpejta, inspektoratet kanë liruar javën e shkuar hapësira plazhesh publike nga Velipoja në Ksamil por kjo gjë ka ndodhur në mes të sezonit turistik veror. Gjithashtu edhe ndërhyrja ligjore në të mirë të pushuesve që propozon kryeministri pritet ti ketë efektet e saj verën tjetër pasi për këtij sezoni veror nuk i ka mbetur më as edhe një muaj kohë. /Opinion.al
