Kryeministri Edi Rama iu përgjigj komentuesve në rrjete sociale në rubrikën “Sy m’Sy”, ku njoftoi se qeveria amerikane ka përzgjedhur Shqipërinë për një investim madhor në fushën e energjisë.
“Rama veç në Arabi ka mbetë, pse nuk bën biznese në Evropë e Amerikë?”, “Ta kthej unë përgjigjen vëlla: Sepse nuk duan, nuk kanë interes”, ishin komentet e qytetarëve.
Përmes një video, Rama ka hedhur poshtë këto aludime duke thënë se investitorët e huaj që vijnë kryesisht nga Evropa dhe Amerika bëjnë investime me vlerë mbi 1 miliardë Euro gjatë 1 viti në Shqipëri.
“Sa u ktheva dhe po lexoja komentet tuaja, “Rama ka mbetur vetëm me arabë, pse nuk bën biznes në Evropë dhe Amerikë”, komenton Simoni, “Ta kthej unë përgjigjen”, i thotë Fatosi, “se nuk duan vëlla, nuk kanë interes”. Tani nuk e di se për kë e ka që nuk ka interes për ne apo Evropën dhe Amerikën, siç pyet Simoni, por për këdo që ta ketë, nuk ka diçka më larg të vërtetës duke filluar që nga marrëveshja e sotme, ku isha mes arabëve dhe italianëve dhe Italia është në Evropë. Tani, e dini sa biznes bëjnë investitorët e huaj në Shqipëri në 1 vit? Investime të reja, mbi 1 miliardë Euro. Dhe e dini se nga vijnë? Nga Evropa, Amerika, shumica dërrmuese. Po ne qeveria sa e sa projekte bëjmë ne me financime të huaja? Thuajse të gjitha vijnë nga Evropa dhe para pak ditësh, qeveria amerikane, na njoftoi se e ka përzgjedhur Shqipërinë për një financim të madh në fushën e energjisë që janë fondet e qeverisë amerikane. Kjo është e vërteta”, shprehet Rama.
