Kryeministri Edi Rama deklaroi se në Mars Shqipëria do të hap grupkapituj të tjerë për negociatat me Bashkimin Europian.
Në një bashkëbisedim me qytetarët në rubrikën “Sy m’Sy” në rrjete sociale, Rama tha se kjo gjë nuk i ka ndodhur asnjë vendi tjetër, pasi sipas tij Kroacisë i janë dashur 7 vite për ta mbyllur këtë çështje.
“Për herë të parë që kur kemi hyrë në procesin e materializimit të ëndrrës së madhe që u shpreh me atë thirrje “Ne e duam Shqipërinë si e gjithë Europa”, për herë të parë na ndodh që ne të kemi një përputhje të të dyjave, të rrethanave tona të brendshme të kësaj ëndrre me rrethanat e brendshme të Europës dhe me vullnetin e tyre për të na marrë brenda.
Kur Europa ishte më e hapur ndaj zgjerimit, ne nuk ishim askund. Kur donin të behemi më të pranueshëm ata humbën dëshirën për zgjerimin dhe në këtë momentë janë përputhur gjërat. Ne ulëm në tryezë dhe filluam të negociojmë. Dhe vjet, në gjysmën e dytë dhe na është dhënë një kornizë, kemi rënë dakord që t’i mbyllim negociatat në 2027. Që i bie 2024-2027, i bie më pak se 3 vjet. Nuk i ka ndodhur asnjë vendi tjetër. Kroacisë i janë dashur 7 vite që ka shkëlqyer në atë punë. Mali i Zi ka vite e vite që është në këtë proces.
Dhe kjo pse? Sepse është përputhur rritja e besueshmërisë tonë, rritja e respektit ndaj nesh fal punës që ne bëjmë me nevojën e tyre për të zgjeruar BE dhe për të dhënë një sinjal shumë të fortë që po shkojmë drejt një riunifikimi të Europës dhe përsëri në Mars ne do të hapim grupkapituj të tjerë zyrtarisht të negociatave. Në këtë proces janë 1000 persona që punojnë me negociatat me të gjithë sektorët“, tha Rama.
Rama renditi edhe 3 përfitimet kryesore që fiton Shqipëria me anëtarësimin në BE.
“Futja në BE na jep 3 përfitime shumë, shumë të rëndësishme të cilat nuk mund t’i garantojmë për të nesërmen. Liritë individuale, kush është jashtë BE i ka gjithmonë të kërcënuara. Në BE liritë individuale janë të garantuara.
E dyta, barazia para ligjit. Shikoni si është situata, unë sot jam këtu, nesër nuk jam këtu. Dikush nesër vjen me një qeveri tjetër dhe thotë të përmbysim reformën në drejtësi, ta mbyllim, t’i vëmë çelsin SPAK-ut, t’i vëmë çelsin të gjitha institucioneve të reja dhe të kthehemi atje ku ishim.
Nëse jemi në BE gjithçka është e garantuar dhe barazia para ligjit është në një nivel tjetër edhe brenda edhe jashtë sepse ajo pasaporta që Republika e Shqipërisë, nuk është vetëm Republika e Shqipërisë, por do të shkruajë Bashkimi Europian. Dhe secili apo secila qoftë shqiptar që jeton këtu, qoftë shqiptar që jeton jashtë do të jetë komplet i barabartë para ligjit.
Dhe e treta janë standardet, të gjitha standardet e jetesës janë të garantuara”, tha Rama.
