Kryeministri Rama në një konferencë për shtyp në krah të përfaqësues së lartë të Bashkimit Europian Federica Mogherini, ka thënë se Shqipëria i ka bërë “detyrat e shtëpisë”, por fati i hapjes së negociatave varet nga vetë vendet anëtare.
“Natyrisht që nuk do të marr kohë për të bërë një listë të prioriteteve të dhjetë rezultateve përkatëse, as për të nënvizuar ecurinë e reformës thelbësore në këtë proces, atë në drejtësi, por dua ta rinënvizoj atë që diskutuam, që i shpreha përfaqësues së lartë të BE se ne jemi të vetëdijshëm që në fund të ditës gjykimi dhe vendimi final mbi rekomandimin e komisionit do të varet nga rrethanat specifike në vetë vendet anëtare. Jemi të vetëdijshëm se vendimmarrjet për në nivel vendesh anëtare varen nga ne po aq sa varen edhe nga faktorë jashtë nesh, por besoj shumë se është koha për t’i dhënë fund një përpjekjeje për një fazë, siç është faza e përgatitjes së negociatave, dhe për t’i filluar ato”, tha kryeministri Rama në krah të Federica Mogherinit.
Federica Mogherini ndodhet në Tiranë në takimin e liderëve të Ballkanit. Ky është takimi i dytë me kryeministrin Rama brenda një javë, pas takimit në Berlin./Opinion.al
