Kryeministri Edi Rama zhvilloi këtë të shtunë një takim në universitetin e Vlorës, “Ismail Qemali”, ku të pranishëm ishin staf akademik, studentë shqiptarë dhe të huaj.
Gjatë fjalës së tij, Rama theksoi se ndërkombëtarërizimi është priotitet i qeverisë për sa i takon universiteteve.
Po ashtu Rama u shpreh se hapja e sa më shumë dyerve për studentët, për pedagogët në Europë dhe njëkohësisht sjellja e sa më shumë dijeje dhe eksperienca nga Europa në universitetet e vendit tonë janë një domosdoshmëri për transformimin e mëtejshëm të universitetit.
“Ndërkombëtarizimi është prioriteti ynë sa i takon universiteteve. Hapja e sa më shumë dyerve për studentët, për pedagogët në Europë dhe njëkohësisht sjellja e sa më shumë dijeje dhe eksperienca nga Europa në universitetet tona janë një domosdoshmëri për transformimin e mëtejshëm të universitetit që ju ofrojnë të njëjtat programe me të njëjtat standarde si në vendet e Europës. Kemi bashkëpunuar me rektorët, kemi bashkëpunuar me ministritë përkatëse të Arsimit, të shkencës në vende të ndryshme të Europës, kemi organizuar takime të përbashkëta për të nxitur këtë proces. Besoj që në këtë rrugë do të mund të shohim vit pas viti fryte të reja gjë që u jep mundësi stafeve universitare dhe ekipeve akademike të universiteteve që të mund të përfitojnë financime prej të cilave të rrisin edhe të ardhurat e tyre drejtpërdrejt nga puna shkencore”, tha Rama.
