Kryeministri Edi Rama ka lançuar sot portalin “Mjekë për Shqipërinë”, e cila shërben si një dritare e re për ata që përfundojnë studimet rishtaz për mjekët specializantë.
Gjatë prezantimit të portalit kryeministri tha se tashmë po zgjidhet problemi i mospasjes së mjekëve specializantë kryesisht në spitalet e rretheve. Madje për ata mjekë të cilët vendosin të punojnë në spitalet jashtë Tiranës qeveria ofron një bonus prej 2.5 milion lekësh në muaj mbi rrogën. Sipas Ramës kjo do të thotë këta mjekë do të përfitojnë më shumë se cdo të përfitonin në Gjermani në momentin e parë pasi nisin punën atje.
“Besoj që e dini që ka një bonus mbi rrogën, edhe nuk është pak, është 2.5 milion lekë të vjetra mbi pagën në muaj për mjeket specialistë që pranojnë të shkojnë në një spital jashtë Tirane. Dhe marrin një rrogë që po të heqim taksat qe do të paguanin në gjermani është më e madhe se në Gjermani në rast së do punësoheshin sa të arrinin në Gjermani në spital. Në xhep do ju mbeteshin më shumë se në Gjermani në muaj”, tha Rama.
Kryeministri shtoi se nga Janari 2018 janë punësuar 480 mjekë ndër të cilët 235 janë specialistë. Për momentin janë 112 vende vakante për mjekë të përgjithshëm dhe specialistë dhe 79 vende për mjekë në spitale. Këto vende do të shpërndahen në bazë të rankimit në portalin “Mjek për Shqipërinë”.
