Pas takimeve të fundit intensive, dy krerët e mazhorancës duket se kanë arritur të kalojnë ngërcin në lidhje me reformën në drejtësi.
Kjo bën të mundur që nesër të zhvillohet edhe mbledhja e shtyrë disa ditë më parë e Komisionit të Posacëm parlamentar, që do t’i dërgojë Venecias punën e ekspertëve.
Komisioni i posacëm Parlamentar për Reformën në Drejtësi do të mblidhet të premten në ora 11:00 për t’i dërguar Venecias rezultatin e punës së ekspertëve.
Zgjidhja e ngërcit brenda mazhorancës, i cili që prej datës 12 janar mbante pezull thirrjen e mbledhjes, u arrit në takimin dy orësh që Edi Rama dhe Ilir Meta zhvilluan në ambientet e vilës 30 mbrëmjen e të mërkurës.
Kreu i Parlamentit, njëherësh lider i LSI-së, mësohet se ka bindur aleatin e tij në krye të Qeverisë, që Komisionit të Venecias t’i dërgohet më shumë se një draft, gjë që do të mundësonte LSI-në, por edhe Partinë Demokratike, të nisin draftet e tyre përtej Adriatikut, pa qenë të detyruar që t’i shkrijnë ato në draftin e ekspertëve të thirrur nga Komisioni i drejtuar prej Fatmir Xhafës.
Pas darkës dy orëshe, mëngjesi i enjtes i mblodhi përsëri dy krerët e mazhorancës. Por ndërsa Edi Rama që prej orës 9, sipas axhendës, e priste Ilir Metën në paradhomën e zyrës së tij, ky i fundit mbërriti në zyrë me 40 minuta vonesë. Pas 1 ore e gjysëm bisede kokë më kokë, Edi Rama u largua nga zyra e Metës pa dhënë asnjë prononcim.
Zhvillimet e fundit interesuan edhe ambasadoren e Bashkimit Europian, Romana Vlahutin, e cila u paraqit në këmbë në Kryesinë e Kuvendit, për të marrë nga Meta garancinë se proçesi i Reformës në Drejtësi do të vazhdojë. /abcnews/
