Kryeministri Edi Rama ka mbledhur këtë të mërkurë në sheshin “Skënderbej” punonjësit e bashkisë së Tiranës.
Para punonjësve të bashkisë, Rama u shpreh se Partia Socialiste ka transformuar drejtësinë në Shqipëri, ndërkohë që sipas tij opozita po tenton të shkatërrojë Prokurorinë e Posaçme dhe Reformën në Drejtësi.
Kryesocialisti tha gjithashtu se ashtu si çdokush që bënë gabime në punën e tij, edhe organet e reja të drejtësisë nuk kanë si të jenë të pagabueshme.
Pjesë nga fjala e Edi Rama:
Ashtu siç kemi ndryshuar Tiranën me mundime të mëdha, ashtu dhe kemi vendosur të transformojmë drejtësinë në Shqipëri. Ashtu siç shembëm ato ngrehina e shëmtuara që kishin varrosur parqet nën barqet me ujëra të zeza, ashtu kemi shembur arkitekturën e vjetër të drejtësisë me reformë në drejtësi.
Me Vettingun kemi pastruar një pjesë të rëndësishme të sistemit të kalbur të drejtësisë, qe trashëguam nga ata që trashëguam edhe Tiranën e 25 viteve më parë. Ashtu siç na u kundërvunë me llumin e tyre që kanë 30 e kusur vite që llokoçiten, edhe kur nisëm të ndërtonin hyrjen e zogut të zi, sheshin Skënderbej, duke ua vënë kazmën të dyjave për t’i zëvendësuar me shpifësirat e tyre, ashtu duan t’i vënë kazmën edhe SPAK, Referomë në Drejtësi.
Ashtu si Roma që nuk u ndërtua në 7 ditë, edhe Tirana e re mori vitet e saj, edhe drejtësia e re do të marrë të sajat. Ashtu si ne që në detyrën tonë bëjmë gabime, edhe organet e reja të drejtësisë nuk kanë si të jenë të pagabueshme.
Gabimet tona nuk shkatërrojnë jetë njerëzish siç ndodh kur gabion drejtësia. Të kërkosh nga një drejtësie e re me kaq pak vite pavarësi dhe pak kulturë evropiane siç kjo është e jona, është njësoj si të hedhësh një fëmijë në ujë dhe t’i thuash mos u lag….
Nëse duam që Shqipëria e nesërme të jetë e drejtë dhe e barabartë para të gjithëve siç është Tirana sot evropiane për të gjithë, duhet të shtrëngojmë dhëmbët, të durojmë dhe të vazhdojmë të luftojmë.
Dëmet janë sa të dhimbshme dhe të padrejta, por kush udhëheq nuk duhet të lëkundet nga asnjë dhimbje në rrugën e drejtë të vizionit që ka zgjedhur, përndryshe degradon.
