Kryeministri Edi Rama përmes një postimi në rrjete sociale shprehu sot ngushëllimet për ndarjen nga jeta të legjendës së futbollit gjerman Franz Beckenbauer.
“Kaiser Franz ishte si një valltar i dalë nga koreografitë e mjeshtrave të baletit modern në qendrën e mbrojtjes së Gjermanisë, ku ngriti kupën e botës e më pas, si një personazh i letërsisë gjermane në këmbë përpara stolit të Bundesmanschaft-it, kur e udhëhoqi Gjermaninë drejt një tjetër kupe të botës. Me ikjen e tij shuhet një tjetër legjendë e gjallë e sportit më të dashur në botë dhe shkëputet një tjetër copë e bukur e fëmijërisë sonë, atëherë kur futbolli ndërkombëtar ishte vetë bota në Shqipërinë e burgosur brenda mureve të komunizmit”, shkruan Rama.
Franz Beckenbauer, një legjendë e futbollit gjerman ka ndërruar jetë në moshën 78-vjeçare.
I quajtur “Der Kaiser” (Perandori), Beckenbauer konsiderohet gjerësisht si një nga futbollistët më të mirë të të gjitha kohërave.
Ai ishte një nga vetëm tre personat që fituan Kupën e Botës si lojtar dhe trajner, së bashku me të ndjerin Mario Zagallo të Brazilit dhe francezin Didier Deschamps.
Përveç suksesit të tij me ekipin kombëtar, ai fitoi shumë tituj gjatë qëndrimit të tij në Bayern Munich, duke përfshirë tre Kupa Evropiane radhazi dhe Kupën Ndërkontinentale.
