Kryeministri Edi Rama ka zhvilluar paraditen e sotme një mbledhje me Grupin Parlamentar të PS. Qëllimi i kësaj mbledhje ishte që të firmoset Marrëveshje e Mirëkuptimit ndërmjet Kryetarit dhe Sekretarit të Grupit me secilin ministër të kabinetit dhe që do t’iu shpërndahet të gjithë deputetëve. Kjo marrëveshje sipas Ramës do të jetë në funksion të bashkëqeverisjes më qytetarët.
“Është një marrëveshje që sanksionon rregullat e bashkëpunimit dhe ndërveprimit mes qeverisë, grupit dhe PS, si tre pjesë të pandashme të të njëjtit ekip. Marrëveshja përmban gjithçka na duhet për të pasur një fuqi qeverisëse si asnjëherë më parë. Lidershipi i grupit, nuk është formal, por është pjesë e ekipit qeverisës dhe po ashtu me detyra të përcaktuara për çdo nënkryetar grupi për të garantuar sinergji. Jemi një parti. Jemi një fuqi. Nuk jemi të ndarë në shtresa. Shtresa e lartë në qeveri, shtresa e mesme në kuvend dhe shtresa e ulët, atje larg për të cilët kujtohemi vetëm kur ka zgjedhje” pati deklaruar më herët Rama.
Mbledhja e grupit është zhvilluar në Kryesinë e Kuvendit, para kësaj mbledhje kryeministri Rama është takuar edhe me kreun e Kuvendit Gramoz Ruçi. /Opinion.al
