Kryeministri Edi Rama ka mbledhur pasditen e sotme ambasadorët në Tiranë, nga ku bëri me dije se iu është drejtuar krerëve të këtyre shteteve me një letër ku u kërkon ndihmë për situatën e vështirë që po kalon Shqipëria. Kryeministri Rama tha se njerëzit janë në panik dhe ata do të bëjnë durim në momentin që do kuptojnë se bota nuk na ka lënë vetëm.
“Unë iu jam falënderues të gjithë liderëve europianë që reaguan për situatën, dua të falënderoj presidentin Erdogan, presidentin Makron, kryeministrin Conte por edhe të tjerë që u solidarizuan me Shqipërinë. Është e mrekullueshme që për këtë situatë reaguan edhe liderët e shteteve fqinje. Është impresionuese si reaguan Serbia, Maqedonia e Veriut, Greqia, për të mos folur më pas për vëllezërit tanë në Kosovë. Ndjese nëse harroj ndokënd, por të gjithë kanë qenë të shkëlqyer. Edhe kryeministri Orban ishte mbresëlënës, edhe liderët rumun, të cilët dërguan ndihma për ne. Ekipi grek bëri diçka që ishte frymëzuese. Kemi bërë shpëtime njerësish të rëndësishme. Nuk iu besoja dot veshëve sa bukur kishte folur Papa Francesku. Princi i Kurorës të Arabisë Saudite po ashtu ka pyetur. Edhe Izraeli ishte i jashtëzakonshëm dhe na pyetën pa ua kërkuar. S’kanë as qeveri akoma dhe na pyetën. U kam shkruar të gjithë udhëheqësve një letër dhe u kam kërkuar ndihmë. Nga kryeministri i Suedisë te Zelanda e Re pa harruar miqtë tanë në Lindjen e Mesme, vëllezër na ndihmoni se ajo që po përballemi tani është një problem mjaft i mprehtë tensioni, njerëzit kanë frikë, janë të pasigurt, kanë nevojë të shohin që gjërat do bëhen më mirë e po mund tu kërkoj të kenë durim por do nisin të kenë durim kur të shohin se bota sdo na lërë vetëm. Gjysma e njerëzve nuk flenë në Tiranë, flenë në rrethina”, u shpreh Rama./Opinion.al
