Kryeministri Edi Rama ka reaguar sërish ditën e sotme në lidhje me vendimin e qeverisë për të ndaluar platformën TikTok për 1 vit në Shqipëri.
Kreu i qeverisë thotë se vendimi u nxorr pas 1300 takimeve të organizuara në të gjithë territorin e vendit nga Ministria e Arsimit pas vrasjes së 14-vjeçarit pranë shkollës “Fan Noli”.
Në total, ai shprehet se morën pjesë 65 mijë prindër dhe nga anketimi i bërë, mbi 90% e tyre kërkuan mbylljen e aksesit në platformë.
“Mirëmëngjes dhe me vendimin e nxjerrë nga 1300 takime të organizuara në të gjithë territorin e vendit nga Ministria e Arsimit, ku morën pjesë 65.000 prindër, si edhe nga anketimi i bërë ku mbi 90% e prindërve kërkuan mbylljen e aksesit në platformën Tik Tok në Shqipëri, ju uroj të diel të qetë”, njoftoi Rama në rrjetet sociale këtë të diel.
Kujtojmë se një ditë më parë, kryeministri Rama tha se TikTok shpërndan “rrugaçërira, perversitete, dhunë, bullizëm, krim, thika, presa, shpata, revole, euro, dollarë”. Ndryshe sipas tij ndodh në Kinë, aty ku ka origjinën platforma. Kreu i qeverisë shqiptare tha se do të duhen 6 deri në 8 javë për mbylljen e plotë të TikTok në Shqipëri.
Vendimi bëri jehonë në mediat ndërkombëtare, ndërkohë që nuk mungoi një reagim edhe nga TikTok. Zëdhënësi i saj është shprehur për Reuters se kompania kërkon sqarime urgjente nga qeveria shqiptare.
“Ne nuk gjetëm asnjë provë që autori ose viktima të kishin llogari në TikTok dhe raportimet e shumta kanë konfirmuar në fakt se videot që çuan në këtë incident po postoheshin në një platformë tjetër, jo në TikTok”, tha kompania.
