Kryeministri Rama tha gjatë daljes së tij publike se Ministri Sandër Lleshaj i ka kërkuar dorëheqjen pas vrasjes së të riut nga një efektiv policie. Rama tha se ky është një gjest njerëzor, qytetar që përcjell një mesazh ndjese dhe që vlen sa një milion fjalë.
Rama:
Menjëherë pas ngjarjes Ministri i Brendshëm më ka informuar dhe më ka vënë në dispozicion dorëheqjen e tij, duke më shpjeguar pse tërheqja e tij ishte rruga e duhur për të personalisht, për mua që i kam besuar atë detyrë dhe për qeverinë e shumicën tonë qeverisëse.
I kam thënë pres të kthehem, sepse kam dashur ta shoh në sy, ta dëgjoj dhe më të dëgjojë dhe të jem bashkë me të në momentit e hedhjes së këtij hapi të rëndësishëm. Jemi takuar dhe sot, jam shumë krenar për sensin e përgjegjshmërisë qytetare dhe kuotën morale në të cilën e mat veten dhe detyrën e tij Sandër Lleshaj. Unë e kam ditur, sot le ta mësojnë dhe ata që duan të besoijnë tek fakti se në këtë vend, jo nuk janë të gjithë njësoj. As politikanët nuk janë njësoj. Ai s’ka asnjë lidhje me aktin e efektivit , por është vrarë një djalë dhe është hapur një varr. Tjetër të ndash dhimbjen me fjalë, tjetër të adresosh brengën me një gjest njerëzor, qytetar, si shqiptar i mirë duke përcjellë një mesazh ndjese që vlen sa një milion fjalë.
