Në përfundimit të sesionit të parë të Komunitetit Politik Evropian, kryeministri Edi Rama duke bërë batuta me liderët evropianë u citoi atyre Kanunin e Lekë Dukagjinit.
Teksa i ftoi për të ngrënë drekë pas mbylljes së pjesës së parë të punimeve, Rama tha se zakonisht dreka nuk është falas, por në Shqipëri është e kundërta, pasi në çfarëdo cilësie, do të jenë të mikpritur.
“Në kanunin tonë, të shkruar kohë më parë, ka një kapitull që ka të bëjë me mikpritjen. Ajo fillon me një citim “Shtëpia e shqiptarit i përket Zotit dhe mikut”.
Kjo fjali është vërtet shumë e thellë dhe është edhe origjinë e faktit që ne arritëm në fundin e Luftës II Botërore si vendi që kishte më shumë hebrenj se sa kishte pasur në fillim të saj, të cilët shqiptarët i mbrojtën me jetën e tyre. Por ndër të gjitha këto gjëra që ne bëjmë për miqtë, kemi shumë të rëndësishme që t’u japim ushqim shumë të mirë.
Pavarësisht se thuhet që dreka asnjëherë nuk është falas, sot do ta shikoni që është e kundërta sepse sa herë që të vini në Shqipëri, në çfarëdolloj cilësie, do ta shikoni që do të jeni të mirëpritur”, tha Rama.
