Kryeministri Rama u ka dërguar një letër të hapur lojtarëve të kombëtares kuqezi dhe trajnerit De Biazi pas ndeshjes së djeshme, ku Franca mposhti Shqipërinë 2-0 me dy gola në minutat e fundit
Rama shkruan se ai, si gjithë të tjerët është i hidhëruar me pozicionin e Shqipërisë në Grupin A, i cili sipas tij nuk tregon aspak paraqitjen e Shqipërisë në dy ndeshjet e para. Sipas Ramës, shkëlqimin e lojës kuqezi nuk e zbeh kurrsesi humbja në minutat e fundit.
“Krenarë për ju u larguan nga sheshet e mbushura plot të Shqipërisë e të Kosovës, për të ndjekur duelin tuaj heroik, edhe mijëra e mijëra të tjerët që e veshën mbrëmë kuqezi trupin e trojeve tona. Po edhe milionat e të tjerëve, qe ju ndoqën nga shtëpitë apo klubet kudo, në Shqipëri, Kosovë, Maqedoni, Mal të Zi, Preshevë e Bujanovc apo vende të tjera të Europës e botës, u ndjenë krenarë për ju pas përfundimit të lidhjes direkte me fushën, ku rezultati ishte si një dënim krejt i pamerituar i çastit të fundit”, shkruan Rama.
